على دروب القطار اكتب حكاية وداع !!!

حاس بالي وهمَ القلب علـم(ن) مـذاع
وازدات العبـرة اللـي ترثـي احبابهـا
توديع ياثقـل وقعـه شتَـت الاجتمـاع
لحظـة (ن) سمَهـا كالحيـة ونابـهـا
يوم اركبوا فالقطار وغادورا بانسـراع
لاحت مزون العيـون وصكَـة اهدابهـا
على دروب القطار اكتـب حكايـة وداع
حبري هو الدمع وخدَي صفحة اكتابهـا
ماكنت أظن اني اخضع للوداع انخضاع
ساعة(ن) وسط قلبي ضـرب مشعابهـا
نار الفراق القلـوب اتذوقهـا بلتيـاع
عوج الحنايا حطب... والحزن شبَابهـا
هذي سوات الليالي في سنين(ن) متـاع
دنين تموَج ويغـرق موجهـا اغرابهـا
كم واحد(ن) ممسين بالليل مابـه رواع
والصبح مفجوع مـن دنيـاه معطابهـا
غرَتـه دنيتـه يـوم ألبستلـه قـنـاع
ماكشـف زيفهـا ليـن انغلـق بابهـا
حياتنـا الدنيويـه خاتمتهـا انقـطـاع
تقولـه اقلـوب بالنبضـات لاصحابهـا
كل(ن) يجيه الفنا لو كان باقصى الوساع
أرواحنـا كالشجـر والمـوت حطَابهـا
قلته وانا واقف(ن) وانطر نهار الـوداع
تنزع به الروح وترهن في ذرا احسابها
لابد ياتيني يوم(ن) ارتحـل بانصيـاع
على قطـار الرحيـل الـروح مركابهـا
تمَت وصلوا على من بالكفاح استطـاع
نشر العقيده بحضر القـوم واعرابهـا
رسول رحمة لكل الخلق فـوق البقـاع
له سيرة(ن) بالهدى والنـور يدرابهـا